غزو سوريا سنة 1400 هو غزو المغول بقيادة تيمورلنك لسوريا سنة 1400-1401م / 803هـ و تدميرهم لمدنها و استيلاءهم على دمشق. مصر كانت بتحمى سوريا من المغول و خاضت حروب ضخمه ضد هولاكو و آباقاخان و غازان للدفاع عن سوريا ، لكن لما غزا تيمورلنك سوريا سنة 1400 مصر كانت ظروفها الداخليه وحشه بعد وفاة السلطان الكبير الظاهر برقوق و ما قدرش الجيش المصرى يكمل تصديه للمغول فكان على السوريين الدفاع عن نفسهم المره دى.
فى نص سبتمبر 1400 وصلت الأخبار من حلب إن تيمورلنك استولى على سيواس و ملطيه و انه دخل عين تاب و نهبها و حرق مزارعها و قتل اهلها و انه دفن ناس بالحيا و ولع نار فى ناس. فضل جيش تيمورلنك يتوغل فى سوريا و وصل الباب و بزاعا جنب حلب ، و من هناك بعت رسله لنايب حلب يهدده انه لازم يستسلم و يدخل فى طاعته و يسك فلوس بإسمه زى ما عملوله فى الهند و غيرها. لما سمع نايب حلب كلام تيمورلنك امر بقطع روس الرسل ، و ابتدا يحصن اسوار حلب و يجهز المدافع و العسكر ، و شيع جواب لمصر يستنجد بيها. لما عرف السلطان " الناصر فرج " فى القاهره من الامير " أسنبغا " ، اللى كان بعته يستكشف الأخبار ، إن المغول استولوا على بهسنا و محاصرين قلعتها ، ابتدا يجهز للخروج على سوريا و جمع العساكر ، و بعدين وصله جواب تانى من " أسنبغا " بإن المغول دخلوا نزاغه و بقوا على مشارف حلب و انهم زحفوا على جبلان و ابتدوا ينهبوا المزارع و يقتلوا الناس و يسبوا الستات و يحرقوا الأشجار.
نايب طرابس " شيخ المحمودى " خرج بـ 700 فارس من عسكر الشام عشان يحارب مقدمة جيش تيمورلنك اللى كان عددها 3000 محارب ، و دخل معاهم فى معركه و قدر انه يإسر منهم اربعه وسطهم ( يعنى قطعهم نصين ) على ابواب حلب.
فى دمشق لما وصلت الاخبار ، اتلم الناس فى الميدان و رفعوا السيوف و عملوا استعراض قدام النايب و بعدين رجعوا بيوتهم و خرج القضاه و نادوا بمحاربة تيمورلنك. و وصل الامير " أسنبغا " من القاهره و قرا جواب من السلطان فى جامع دمشق و طمن الناس إن العسكر المصرى فى السكه. فى الغضون دى وصل رسول من تيمورلنك بجواب للمشايخ و القضاه و الأمراو طلب الإستسلام و إلا دم اهل دمشق حايكون فى رقابيهم.
فى أواخر اكتوبر بعت تيمورلنك رسول لدمرداش نايب حلب يقوله انه اختاره يبقى نايب ليه على حلب و طلب منه انه يقبض على " سودون " نايب الشام. لكن دى كانت لعبه من تيمورلنك عشان يقوم النواب على بعض فضرب دمرداش رسول تيمورلنك و قتله لإنه اتغاظ منه لما قاله قدام النواب : " الامير (تيمولنك) بعتنى ليك انت بس إكمنك طلبت منه يدخل حلب و بلغته ان البلاد مافيهاش حد يدافع عنها "